Miulbo ang dakong sunog kagabii sa usa ka karaang hotel ning dakbayan sa Davao.
Subay sa inisyal nga report sa mga otoridad, gilamoy sa kalayo ang Imperial Hotel nga nahimutang sa CM Recto St. kon Claveria ning syudad sa Davao pasado alas Dyes ang takna kagabii.
Nasayran nga nagsugod ang pag-ulbo sa kalayo sa ikatulong andana sa maong Hotel.
Ubay-ubay usab ka mga kabomberohan ang miresponde sa maong panghitabo nga milungtad pa halos duha ka oras una kini gideklara nga fire out.
Sa pagkakaron nagpadayon pa ang gihimong imbistigasyon sa mga kabomberohan aron masuta ang tinubdan sa pag-ulbo sa sunog.
Hinuon walay natalang kadaot sa kinabuhi atol sa maong panghitabo.
Samtang ginasubay pa usab sa mga otoridad ang kinatibuk-an nga danyos.
Atol sa maong panghitabo, nakamugna usab kini og temporaryo nga power interruption sa sikbit nga mga gambalay ilabi na sa usa ka condominium.
Samtang sa laing bahin adunay nahitabo usab nga sunog sa Purok 5 Sitio La Paz, Brgy. Magtuod ning dakbayan sa Davao kagabii diin ugdaw ang usa ka panimalay.
Padayon pa usab karon ang gihimong imbistigasyon sa mga otoridad aron masayran ang hinungdan sa pag-ulbo sa kalayo.
