Paghiusa sa mga loyalista ni kanhi Pangulong Rodrigo Duterte ang ipahigayon sa Amsterdam, Netherlands, pinaagi sa usa ka prayer vigil ug freedom march. Ang kalihukan nagtinguha nga ipanawagan ang pagbasura sa kaso batok sa kaniya sa International Criminal Court (ICC).
Kumpirmado kini ni dating Presidential Spokesman Atty. Harry Roque sa iyang live broadcast.
Magsugod ang mga kalihukan sa Setyembre 19, alas-5:00 sa hapon pinaagi sa usa ka prayer vigil sa Amsterdam.
Sa sunod adlaw, Setyembre 20, ipahigayon ang usa ka freedom march nga magpahayag sa hangyo nga ihunong na ang kaso batok sa 80-anyos nga kanhi Pangulo.
Sa Setyembre 21, ipahigayon ang usa ka panel discussion ug fellowship nga gi-organisar sa grupo nga DDS Maisug.
Ang maong kalihukan gihimo samtang naghulat pa ang ICC sa sunod hearing sa reklamo, human kini malangan tungod sa hangyo sa depensa nga may kalabotan sa kahimsog sa kanhi Pangulo.
