Gibutyag ni Office of Civil Defense Regional Director Ednar G. Dayanghirang nga subay sa ilahang pagtuon sukad niadtong Disyembre sa nakalabay nga tuig adunay duha ka mga panginahanglanon sa rehiyon aron nga masulbad ang problema sa baha.
Sumala pa ni Dayanghirang nga Una, ang tibuok rehiyon nagkinahanglan pa og daghan ug dinagko nga mga flood control projects aron mahatagan og kasulbaran ang problema sa baha sa nagkadaiyang lugar ilabi na sa mga lagyong dapit dinhi sa rehiyon.
Kini ang nahimong pahayag sa opisyal atol sa gipahigayon nga press conference sa usa ka mall sa Ecoland kagahapong adlawa mahitungod sa init nga hisgutanan karon sa nasud kabahin sa flood control projects nga gipailawom karon sa imbistigasyon.
Gikanayon usab sa opisyal nga kini nga mga kakulangon ang iyahang nakita nga kinahanglan gayud nga madugangan aron nga masulbad ang mga pagbaha ilabi na sa mga kabaranggayan gikan sa probinsya sa Davao Occidental ngadto na sa Davao Oriental.
Ikaduha, gikanayon niini nga sa ilahang pakigsusi sumala pa sa nagkdaiyang bahin sa rehiyon adunay dakong problema sa mga kasamtangang drainage system gumikan kini mga barado.
Usa sa mga gilantaw niini nga hinungdan ang kadaghan na usab sa mga tawo.
Gipunting ni Dayanghirang nga kini maoy hinungdan nga gamay lamang ang ulan makamugna gilayon og baha tungod sa mga nakabara sa agi-anan sa tubig.
Samtang nadiskubrihan usab niini nga adunay mga drainage nga dili konektado ngadto sa uban tungod sa managlahing proyekto ang nagpatuman niini.
Sa nahimong asessment sa nasampit nga opisyal, ang problema sa mga kanal sa atong rehiyon nagkinahanlan sumala pa og ahensya nga maoy motutok, magplano ug magsusi sa nasampit nga proyekto alang sa kasulbaran sa pagbaha dinhi sa rehiyon.
