Ginalaumang mosulod sa Philippine Area of Responsibility (PAR) sulod sa 24 ka oras ang Severe Tropical Storm (STS) “Podul,” sumala sa Philippine Atmospheric, Geophysical and Astronomical Services Administration (Pagasa) karong Dominggo, Agosto 10. Base sa forecast sa state weather bureau, padayon nga paspas ang lihok sa STS “Podul” samtang nagpadayon gihapon ang kusog niini.
Kung makasulod na kini sa PAR, pagatawgon kini og “Gorio.”
Katapusan kini nga namatikdan sa gilay-on nga 1,615 kilometro sa sidlakan sa Extreme Northern Luzon ug kasamtangang anaa pa sa gawas sa PAR.
Aduna kini’y maximum sustained winds nga 110 km/h, pagbugsong moabot sa 135 km/h, ug may central pressure nga 985 hPa.
Nagalihok kini pa-kasadpan sa tulin nga 20 km/h, ug adunay kusog sa hangin nga maabot hangtod 280 km gikan sa sentro.
Gilauman nga magpadayon sa paglihok pa-kasadpan ang STS “Podul” karon ug ugma (Agosto 11), ug posible nga mosibog pa-kasadpan-habagat o pa-amihanang-kasadpan sugod Agosto 12 hangtod sa mosunod nga mga adlaw.
Dili gilauman nga direktang makaapekto sa kahimtang sa panahon ug dagat sa Pilipinas ang STS “Podul” sulod sa mosunod nga lima ka adlaw.
Bisan pa niini, posible nga moagi kini duol o sa ibabaw sa southern Ryukyu Islands sa Agosto 13 (Miyerkules) ug adunay posibilidad nga mo-landfall sa Taiwan sa hapon o gabii sa maong adlaw.
Samtang niini, nagpahimangno ang weather bureau sa publiko ug sa mga ahensya sa disaster risk reduction and management nga padayon nga subayon ang mga update mahitungod sa maong bagyo.
