Nakaplagang wala nay kinabuhi, wala nay bisti ug naglutaw-lutaw na lamang kini sa dagat sa Tacloban ang usa ka patayng lawas sa babaeng biktima niadtong adlawng Lunes petsa 4 ning tuig kasamtangan.
Dali sab nga girespondihan sa mga otoridad ang maong insidente, diin giila ang biktima nga si Arradaza, 35-anyos, usa ka beauty queen sa Leyte.
Sumala pa ni PMaj. Shenna S. Layog ang Acting Police Station Commander sa Tacloban Police Station, nga ilaha nang nakaplagang bloated na sumala pa ang lawas sa biktima, diin wala nay bisti ug nakagawas na sab matud pa ang dila.
Nakita sab sumala pa nga nakahikot na ang liog niini lakip na sab ang kamot ug tiil, samtang gitabunan ang dagway og itom nga panapton ug gibalutan pa og duct tape.
Gumikan sa mga tattoo sa biktima gikumpirma kini sa pamilya nga si Arradaza gayod ang babaeng nakaplagang patay sa dagat.
Subay sab sa inisyal nga imbestigasyon, nga ulahing nakita ang biktima niadtong July 31 sa buntag, diin makita sa maong CCTV nga daw naghulat matud pa ang biktima sa iyahang masakyan, sa dihang adunay usa ka sakyanan ang mihunong sa tungod niini ug pugsanong gipasulod sa maong kotse, apan kaniadtong petsa 4 na lamang, nakaplagang patay na ang babae.
Naplakahan sab sa mga otoridad ang kotse nga mikidnap kang Arradaza diin padayon na kining gina-track sa kapulisan.
Sa karun, padayon pa ang imbestigasyon sa mga otoridad kung si kinsa ang nagpaluyo sa maong mangilngig nga krimen.
