Gikatakdang moduaw si Davao City Acting Vice Mayor Rodrigo “Rigo” Duterte II sa iyang apohan nga si kanhi President Rodrigo Roa Duterte, sa The Hague karong bulan sa Agusto kauban ang iyang mga igsuon ug ang iyang amahan nga si Davao City 1st District Rep. Paolo “Pulong” Duterte.
Gibutyag ni Rigo nga hingpit niining ginapaabot ang maong higayon aron nga magakos ang lolo niini ug ipadangat ngadtong mapasalamaton kini.
Dugang usab sa opisyal, mapahitas-on kini ug ang pamilya Duterte sa mga sakripisyo nga gibuhat ni kanhi Presidente Rodrigo Duterte sa nasud Pilipinas sa dihang anaa pa kini sa katungdanan.
Sumala pa ni Rigo nga dili niini buot nga buhatong politika ang pagbisita niini sa The Hague apan bisan pa man, buot gihapon niining mangayo og tambag sa apohan mahitungod sa pagpangalagad sa katawhan.
Kahibaloang kini ang unang higayon nga nangatungdanan si Rigo diin nakadaog kini isip konsehal apan gumikan sa pagkatingkagol ni FPRRD milingkod kini isip Bise Mayor.
Gipaambit usab sa amahan niining si Davao City 1st District Rep. Paolo “Pulong” Duterte nga makita niini ang pagka-seryoso sa katungdanan sa anak niini.
Kahinumdumang gikatakda usab ang sunod nga hearing sa kanhi pangulo karong umalabot nga Setyembre 23 ning kasamtangang tuig arong kumpirmahon ang mga kaso niini may kalabutan sa matud pang maduguong war on drugs niini.
