Miani og daghang pagdayeg gikan sa mga boksingero sa tibuok kalibutan ang nahimong performance ni eight-division boxing champion Manny Pacquiao sa iyang sangka batok ni Mario Barrios sa Estados Unidos.
Bisan pa nga nagtapos kini sa majority draw ug napanalipdan ni Barrios ang iyang WBC welterweight belt, nagpabilin gihapon ang dakong pagtahod ug pagbilib sa 46-anyos nga Pinoy boxer.
Una nga mipakita sa iyang suporta mao ang Cuban boxer nga si Yordenis Ugas, kinsa misulti nga wala gyud niya damha nga human siya makadaog kang Pacquiao upat ka tuig ang milabay, mobalik pa kini sa ring aron makig-away sa mas batan-ong boksingero nga adunay 16 ka tuig nga gintang sa edad.
Si Ugas usab ang giingong hinungdan sa pagretiro ni Pacquiao sa boxing niadtong 2021.
Gipakita usab ni kanhing WBO junior lightweight titleholder Jamel Herring ang iyang dakong respeto kang Pacquiao tungod kay championship level gihapon ang performance ni Manny bisan upat ka tuig nga wala makig-away.
Samtang si kanhing IBO lightweight titleholder George Kambosos Jr mituo nga si Pacquiao ang nakadaog sa maong away.
Matod pa niya, magpabilin nga inspirasyon si Pacquiao tungod sa iyang kahanas ug kaisog sa sulod sa boxing ring.
