Giduso ni Senador Robin Padilla ang balaod nga nagtumong sa pagpaubos sa minimum nga edad sa criminal liability alang sa mga menor de edad nga nalambigit sa mga heinous crimes.
Subay sa gi-propose nga balaod, posible nang mapasakaan og kasong kriminal ang mga batang mag edad og 10 hangtod 17-anyos kung mapamatud-an nga nalambigit sila sa mga hilabihan ka brutal nga krimen sama sa parricide, murder, infanticide, robbery with homicide, rape, ug mga krimen nga adunay kalabotan sa illegal nga droga ubos sa Comprehensive Dangerous Drugs Act.
Matud pa ni Padilla, dili na angay nga tan-awon nga inosente lamang ang kabatan-onan sa tanang higayon, ilabi na sa kasamtangang panahon nga daghan na sa ilaha ang mas na exposed sa social media, internet, ug uban pang modernong impluwensiya nga nakaapekto sa ilahang pamatasan.
Giklaro usab ni Padilla nga ang katuyoan sa balaod dili aron silotan ang tanang kabataan, apan kondili aron protektahan ang katawhan ug pahimangnoan ang kabatan-onan nga aduna na silay obligasyon ug responsibilidad sa ilahang binuhatan, labi na kung kini makadaut sa kinabuhi sa uban.
