Namatay na ang iladong Amerikanang singer nga si Connie Francis sa edad nga 87, sumala sa kumpirmasyon sa iyang suod nga higala nga si Ron Roberts niadtong Huwebes, duha ka semana human siya nadala sa ospital tungod sa grabe nga kasakit nga iyang gibati.
Si Connie natawo sa Newark, New Jersey niadtong 1937 ug ginganlan siya og Concetta Rosa Maria Franconero.
Nailhan siya sa mga awit nga “Pretty Little Baby,” “Everybody’s Somebody’s Fool,” ug “Who’s Sorry Now?” Usa siya sa labing inila nga babayeng singer niadtong 1950s ug 60s, ug mao ang unang babaye nga nakaabot sa #1 sa Billboard Hot 100 chart.
Niadtong Hulyo 2, gidala siya sa usa ka ospital sa Florida ug miagi sa daghang medikal nga eksaminasyon.
Sa iyang mga kataposang post sa social media, miingon siya nga nagpaulian na kini ilawom sa maampingong pag-atiman sa mga doktor.
Bisan og nagretiro na siya sa musika niadtong 2018, misikat pag-usab ang iyang kanta nga “Pretty Little Baby” sa TikTok—kapin sa 60 ka tuig human kini unang gipagawas.
Nailhan usab si Connie sa iyang pakigbisog batok sa dagkong personal nga pagsulay.
Siya nabiktima og pagpanglugos, nawad-an og tingog human sa operasyon, ug nawad-an og igsoon nga gipatay sa mafia.
Gidetalye niya ang tanang kasinatian sa iyang memoir nga “Who’s Sorry Now?” nga gipagawas niadtong 1984.
Bisan sa tanan nga iyang giagian, nahimo siyang tingog alang sa mga biktima sa kasakit, ug nakigtambayayong sa administrasyong Reagan alang sa kampanya batok sa krimen.
Karon, ginahandom ang iyang mga kanta isip tinubdan sa inspirasyon, ug ginailhan siya isip tingog sa iyang henerasyon.
