Patay ang giila nga labing tigulang nga marathon runner sa tibuok kalibutan human nga na-hit and run sa India.
Giila ang biktima nga si Fauja Singh, 114-anyos nga taga Punjab, India.
Subay sa gihimong imbistigasyon sa mga otoridad, gibanggaan si Singh sa wala mailhing sakyanan samtang nitabok kini sa karsada duol sa ilang barangay.
Sa pagkakaron, nagpadayon pa ang imbestigasyon sa kapulisan aron mahibal-an kung kinsa ang responsable sa insidente.
Si Singh, ang natawo niadtong 1911, nakahuman sa Toronto Waterfront Marathon niadtong 2011 sa edad nga 100.
Sa maong marathon event usab niadtong 2003, narekord niini ang iyang labing paspas nga oras nga lima ka oras ug 40 ka minutos.
Apan, wala siya nalista sa Guinness Book of World Records isip labing tigulang nga marathon finisher tungod kay wala siyay birth certificate nga makapamatood sa iyang edad.
Sumala sa mga report niadtong 2011, wala pa kunoy opisyal nga rehistro sa iyahang paghimugso sa India sa tuig 1911.
Usa siya ka amateur runner sa iyang pagkabatan-on, ug midayo sa London diin nagsugod kini og pagsalmot sa mga lumba pag-abot sa edad nga 89.
Nakasalmot usab kini sa daghang marathon ug mga 10-kilometros nga dagan sa wala pa siya miritiro niadtong 2013.
Ang iyang kinabuhi usa ka inspirasyon sa daghang mga atleta ug mga katigulangan sa tibuok kalibutan nga usa ka buhing pamatuod nga ang edad dili babag sa determinasyon ug kalampusan.
