Mi-atras sumala pa ang beteranong abogado nga si Lorna Kapunan isip legal counsel sa bilyonaryong gaming tycoon nga si Charlie “Atong” Ang, usa ka semana human kini nagsampa og reklamo batok sa whistleblower nga nagdugtong kang Ang sa pagkawala ug gituohang pagpatay sa kapin 30 ka mga sabungero.
Matod sa kasaligan nga tinubdan, mas gipili ni Kapunan nga biyaan ang kaso aron makatutok sa iyang papel isip volunteer private prosecutor sa umaabot nga impeachment trial ni Bise Presidente Sara Duterte.
Bisan pa niana, gitan-aw karon sa mga lider sa House of Representatives ang posibilidad nga kuhaon siya sa prosecution panel tungod sa “bad optics” nga resulta sa isyu.
Sa pagkakaron, wala pay opisyal nga kumpirmasyon gikan kang Atty. Kapunan samtang nagkadool ang tentatibong petsa sa pagsugod sa trial nga gitakda ni Senate President Francis Escudero karong Hulyo 29. Ang kaso ni Ang pagadumalahon na karon sa Rondain ug Mendiola Law Office.
