Tingkagol na karon sa prisohan ang usa ka habal-habal driver human giingong midunggab kini og taxi driver atol sa panagbangi nga nahitabo sa Matina Crossing, kagabii.
Subay sa imbestigasyon sa Talomo Police Station, nagsugod ang panaglalis duol sa usa ka convenience store sa Matina Aplaya diin nasuko sumala pa ang suspetsado human siya giinsulto sa taxi driver tungod sa iyang pag-agi sa bike lane.
Gitawag matod pa siya og “b*go” ug mga di maayong pulong sa biktima, hinungdan sa iyang kasuko.
Sa dihang nag-abot sila sa Matina Crossing, kalit giabrihan sa rider ang purtahan sa taxi, gibunlot ang driver, ug gidunggab gamit ang half scissor blade.
Ang biktima giilang si alyas “Rondo,” 22-anyos, usa ka taxi driver ug lumulupyo sa Barangay Bago Oshiro, Mintal, Davao City kansa nakahiagom og samad sa tiyan apan nagpabiling conscious, alert, ug responsive pagdala sa balay tambalanan.
Gisugdan dayon sa kapulisan ang hot pursuit operation nga miresulta sa pagkadakop sa suspetsado nga giilang si Rante Delmar, 42-anyos, usa ka habal-habal driver ug residente sa Purok 2, Mohon, Barangay Langub.
Narekober sa mga otoridad ang black-red nga Honda XRM nga motorsiklo nga gigamit sa suspek ug ang half scissor blade nga nabiyaan sa crime scene.
Giandam na ang kasong frustrated homicide batok sa suspek nga kasamtangang anaa kustodiya sa Talomo Police Station 3.
