Gikabalak-an sa UNAIDS ang misaka nga kaso sa HIV sa Pilipinas, nga mitaas og 543% sukad pa sa 2010 – ang pinakapaspas nga pagtaas sa Asia-Pacific.
Base sa datos sa UNAIDS, ang Pilipinas ang adunay pinakapaspas nga pagtubo sa bagong kaso sa HIV sa tibuok rehiyon sa Asia-Pacific, samtang sa ubang mga nasod, mikunhod na ang mga kaso.
Sumala sa Department of Health (DOH), kapin 139,000 na ang buhing nagpuyo nga adunay HIV sa nasod, ug gibanabana nga mabot kini og 252,000 sa wala pa matapos ang tuig 2025.
Matod ni Health Secretary Teodoro Herbosa, hapit 50% sa bagong mga kaso nagikan sa mga kabatan-onang edad 15 hangtod 24 anyos.
Kadaghanan niini gikan sa same-sex relationships, unprotected sex, ug mga tawo nga nakaila pinaagi sa dating apps.
Gipakita usab sa DOH nga ang kakulang sa sex education, kakahadlok o kahihiyan, ug relihiyosong stigma ang pipila sa mga hinungdan sa padayon nga pagsaka sa kaso.
Niadtong Hunyo, girekomendar sa DOH nga ideklara na ang HIV isip national public health emergency aron mapadali ang pagtubag sa gobyerno, apan hangtod karon, wala pa kini gitubag sa Malacañang.
Bisan pa man nga naa nay libre nga HIV testing ug treatment nga gitanyag sa gobyerno ug mga NGO sama sa LoveYourself, ubos gihapon ang rate sa mga nagpapatest ug mas ubos pa ang porsyento sa mga mitugot sa pagpatambal.
Daghang kabatan-onan usab ang nahadlok nga masayran sa ilang pamilya ang ilang kahimtang, busa naglikay sa pagpacheck-up ug pagpangayo og tambal.
