Gipahibalo sa Department of Science and Technology (DOST) nga posible pa gayud nga marekober ang mga bukog sa nawagtang nga mga sabungero, kon tinuod man gani nga gitambog ang ilang mga lawas sa Taal Lake.
Una nang giangkon sa whistleblower nga si Julie “Dondon” Patidongan nga gilubong sumala pa sa lawom nga bahin sa lawa sa Talisay, Batangas ang ilang mga lawas.
Sumala ni DOST Secretary Renato Solidum, dali ra matunaw o ma-decompose ang unod sa lawas, apan ang mga bukog posibleng mapreserbar, depende sa kalalom sa tubig ug kalidad sa oxygen nga anaa sa palibot.
Giklaro sa mga otoridad nga nangayo na sila og tabang sa Japan aron magamit ang ilang high-tech nga kagamitan sa pagpangita.
Sa baylo nga magpadala og divers, girekomenda ni Solidum nga gamitan nalang og underwater camera, tungod dili luwas ang pagsalom o paglangoy sa lawom nga bahin sa lawa.
Samtang nagapadayon ang imbestigasyon, gipadayag ni Patidongan ang mga pangalan sa pipila ka mga personalidad nga giingong nalakip sa kaso, samtang migawas usab ang kontra-akusasyon sa extortion batok sa mga whistleblower.
