Usa ka helicopter sa kasundalohan sa Uganda nga kabahin sa peacekeeping mission sa African Union sa Somalia ang nahagsa sa Mogadishu airport kagahapong adlawa nga miresulta sa kamatayon sa lima ka mga pasahero, sumala sa sa militar sa Uganda.
Matod pa ni military spokesperson Felix Kulayigye, tulo sa walo ka mga sakay sa helicopter ang nakaluwas apan grabe ang ilang mga samad ug paso sa kalawasan.
Tungod sa kusog nga impact sa pagkahagsa, mibuto ang mga armas nga sakay sa helicopter, nga misangpot sa pagkahulog sa mga estruktura sa palibot ug sa pagkaangol sa tulo ka sibilyan.
Padayon pa karon ang imbestigasyon sa hinungdan sa pagkahagsa nga gipangulohan sa Somalia Civil Aviation Authority.
Bisan paman sa insidente, nibalik dayon ang operasyon sa mga biyahe sa airport human lamang sa gamay nga pagkalangan.
Ang nahitabong insidente nagpadangat sa dakong peligro nga ginaatubang sa mga peacekeepers ug support staff nga nagtrabaho sa mga lugar nga apektado sa kagubot sama sa Somalia.
Gilauman nga ang imbestigasyon maghatag og mga lakang aron mapalig-on pa ang mga safety procedure ug malikayan ang susamang hitabo sa umaabot.
