Gikumpirma ni Department of Justice Secretary Jesus Crispin Remulla ang iyang interes nga mahimong Ombudsman.
Matod niya, magsumite pa siya sa iyang aplikasyon karong umaabot o sa dili pa moabot ang adlaw sa Biyernes ngadto sa Judicial and Bar Council (JBC).
Gikanayon usab niini nga daghan siya og ikatampo ug matabang sa buhatan sa Ombudsman kon siya ang mapili nga molingkod sa maong posisyon.
Kini bisan pa man sa reklamo nga gisang-at batok kaniya ni Senator Imee Marcos didto mismo sa Office of the Ombudsman, nga nagtumong usab sa pipila pa ka ubang opisyal nga adunay taas nga ranggo.
Atol sa pagpanguta ngadto sa opisyal, gibutyag niini nga kung adunay “conflict of interest” ang iyang aplikasyon, iyahang gipasabot nga ang JBC adunay katakos sa tukmang pag-assess ug evaluation niini.
Tungod niini, mapasaligong gipadayag ni Remulla ang iyang hugot nga pagtuo nga walay “conflict” ang iyang pagsumite sa aplikasyon alang sa posisyon sa Ombudsman.
