Mas midaghan pa ang ihap sa mga tawo nga nagsang-at og reklamo batok sa mga online lending application ngadto sa Presidential Anti-Organized Crime Commission (PAOCC).
Sumala ni PAOCC executive director Gilbert Cruz, sulod lang sa duha ka semana, miabot na sa 13,000 ka tawo ang nangreklamo, gikan sa 150 ka reklamo duha ka semana ang nakalabay.
Tungod sa kalit nga pagsaka sa mga reklamo, nagtukod na og one-stop shop ang PAOCC uban ang mga representante gikan sa Securities and Exchange Commission (SEC) ug Philippine National Police (PNP).
Kini nga buhatan maoy motutok ug moasikaso sa mga reklamo aron mas mapadali ang proseso sa pagresolba niini.
Usa sa mga gisampol ni Cruz mao ang kasagarang reklamo nga ilang nadawat nga mao ang mga tawo nga nakautang apan wala dayon nakabayad.
Sa ulahi, sila nahimong biktima sa personal nga pagpangatake, mga malisyosong online post, ug blackmail nga gikan sa loan apps. Sa Pilipinas, gibanabanaan nga adunay kapin sa 300 ka online lending apps, lakip na ang mga narehistro sa SEC.
Nasirad-an na sa PAOCC ug uban pang ahensya sa balaod ang kapin 50 ka lending apps human sa mga serye sa inspeksyon.Matod pa ni Cruz, adunay mga langyaw usab nga nagpaluyo sa maong mga loan app ug nagapanghadlok ug nagapang-biktima sa mga Pilipino.
