Gikatakda nga iduso sa Development Budget Coordination Committee (DBCC) ang P6.793 trilyon nga national budget alang sa tuig 2026.
Kini nga kantidad mas taas og 7.4 porsyento kung itandi sa 2025 national budget nga P6.326 trilyon, ug tugbang sa 22 porsyento sa gross domestic product (GDP) sa nasod.
Sumala sa Department of Budget and Management (DBM), ang unang gipasa nga mga budget proposal miabot og P10.101 trilyon, apan kinahanglan nila kini nga usisahon ug ipailawom sa ibalwasyon ang matag programa ug proyekto aron masiguro nga makatarunganon ang paggasto.
Matod pa ni Budget Secretary Amenah Pangandaman, ang 2026 national budget magahatag og prayoridad sa pamuhunan alang sa kalidad nga edukasyon, maayong panglawas, ug pagpauswag sa kahanas sa mga trabahante.
Samtang padayon usab ang pagpamuhunan sa Build Better More Infrastructure Program ug sa digital transformation sa serbisyo sa gobyerno sa kasamtangang administrasyon.
