Natala karon sa probinsya sa Davao Oriental ang unang kaso sa Monkeypox kon Mpox.
Sa usa ka opisyal nga pahibalo nga gipagula ni Dr. Ben Hur G. Catbagan Jr., City Health Officer, gisusi una ang pasyente pinaagi sa Telemedicine service sa City Health Office ug pagkahuman,nasayran nga nagpositibo kini sa sakit nga Mpox.
Ang pagkolekta sa specimen ug ang confirmatory testing gipangunahan sa City Epidemiology, Surveillance, and Response Unit (CESRU) ug gikompirma sa Research Institute for Tropical Medicine (RITM) pinaagi sa Department of Health Davao Center for Health Development (DOH-DCHD).
Ang pasyente nga nagpakita og mga ginagmay lamang nga sintomas ug stable ang kahimtang sa lawas, gibutang sa home isolation ug hugot ang gipatuman nga pagmonitor.
Ang contact tracing ug surveillance sa mga close contact gipadayon subay sa national guidelines.
Sumala pa sa ahensya nga nakakompleto na sa isolation ang pasyente niadtong Hunyo 20 ug karon nakita na maayong pag-ayo.
Gisiguro usab ni Dr. Catbagan sa publiko nga ang City Health Office, uban sa mga barangay-based surveillance units, nagpatuman og mas gipakusgan nga pagbantay pinaagi sa Incident Management System (IMS) nga nakabase sa Disaster Risk Reduction and Management in Health (DRRM-H) protocols.
Gisiguro usab sa City Health Office sa mga katawhan ang padayon niining paningkamot sa pagpanalipod sa kahimsog sa katawhan ug magpagula pa og dugang pahibalo kon gikinahanglan.
