Nanawagan karon si Philippine National Police (PNP) Chief PGen. Nicolas Torre III sa tanang mga pulis nga tabangan og endorso ang 911 emergency hotline sa katawhan.
Kini human iyang nahibal-an nga bisan pa man og positibo ang feedback sa publiko, ilabi na niadtong nakasinati sa 5-minute response time rule sa ilang han-ay, daghan gihapon ang mga katawhan nga wala pa kahibalo nga epektibo ug paggamit sa 911 hotline.
Sa ilang flag ceremony nga gipahigayon sa kampo kaganihang buntag, nasorpresa si Gen. Torre sa kamatuoran nga daghang mga tawo ang wala pa diay kahibalo nga operational na ang 911 hotline ug uban kanila dili mutuo nga kini naglihok gayud.
Tungod niini, nangayo siya og tabang sa mga pulis nga i-endorso ug ipahimangno pag-usab sa publiko nga ang 911 hotline aktibo ug magamit na.
Gibutyag usab ni Torre nga ang paggamit sa 911 makapadali sa pag-contact sa mga pulis kung adunay emergency o panginahanglan sa tabang, ug ipakita sa publiko nga andam motubag ang kapulisan sa ilang serbisyo.
Sa laing bahin, nalipay ang PNP Chief sa positibo nga mga feedback gikan sa mga katawhang natabangan na sa ilang inisyatibo, partikular sa epektibo nga 5-minute response time rule.
Sumala pa ni Torre, nagpakita kini nga ginaila ug ginasaligan na sa publiko ang serbisyo sa kapulisan alang sa kalinaw ug kahapsay sa nasud.
