Kapin sa 100 ka gamit ni Princess Diana, ipa-auction sa pinakadakong auction karong Hunyo.
Gikatakdang ipahigayon ang usa sa labing dakong auction sa mga personal nga kagamitan sa namatay nga si Princess Diana karong Hunyo 26 sa Peninsula, Beverly Hills, sumala sa Julien’s Auctions sa London.
Lakip sa kapin 100 ka butang nga ipamaligya mao ang mga handbag, kalo, sapatos, ug uban pang accessories nga kaniadto gipanag-iyahan sa prinsesa sa Wales.
Gilauman nga kini nga koleksyon makadani og mga kolektor ug fans sa British royal family gikan sa lain-laing bahin sa kalibutan.
Kahinumduman nga niadtong 1997, pipila ka bulan sa wala pa siya mamatay, si Princess Diana mismo ang nagpa-auction sa kapin 70 ka buok sa iyang mga sinina aron makapangolekta og pondo alang sa iyang mga pinalanggang charity.
Sa milabay nga mga tuig, misaka ang kantidad sa mga memorabilia ni Princess Diana, ug base sa Julien’s, ang pinakahuling sinina nga ilang nabaligya miabot og $1.14 milyon kon Kapin 60 milyon pesos, nga timaan sa padayong pagdayeg ug paghandum sa kalibutan kaniya.
Gilauman nga dako ang interes ug taas ang mga bid sa umaabot nga auction, ilabina kini ang labing dakong koleksyon sa iyang mga kagamitan nga ipagawas sa usa ka higayon.
