Gipahamtangan sa administrasyon ni US President Donald Trump og silot ang upat ka mga huwes sa International Criminal Court (ICC). Ang mga silot nga gipahamtang adunay kalabotan sa arrest warrant nga gi-isyu batok sa kaalyado sa Amerika nga Israel, ilabi na kang Israeli Prime Minister Benjamin Netanyahu, ug sa mga kaso batok sa US.
Kini human nga nakakita ang korte og “reasonable grounds” o lig-on nga basihan sa kriminal nga responsibilidad batok kang PM Netanyahu ug kanhing Israeli Defense Minister Yoav Gallant tungod sa ilang mga lihok nga giilang “war crime of starvation” o krimen sa gubat pinaagi sa pagpanggutom isip armas sa ilang halapad nga opensiba sa Gaza pagkahuman sa kalit nga pag-atake sa Hamas sa Israel kaniadtong Oktubre 7, 2023.
Lakip sa upat ka ICC judges nga gipahamtangan og silot sa US mao sila si Beti Hohler sa Slovenia ug Reine Alapini-Gansou sa Benin, nga nalakip sa mga hearing nga miresulta sa pag-isyu sa arrest warrant niadtong Nobyembre 2024 batok kang PM Netanyahu. Si Alapini-Gansou usab usa sa mga huwes nga nagdumala sa kaso batok kang kanhi Pangulong Duterte sa ICC, nga kaniadto pa gipangayoan sa iyang defense team nga idiskwalipika sa kaso.
Ang duha pa nga ICC judges nga nag-atubang og sanctions mao sila si Luz del Carmen Ibanez Carranza sa Peru ug Solomy Balungi Bossa sa Uganda, nga kabahin sa mga proceedings nga may kalabotan sa imbestigasyon sa mga alegasyon nga ang US nakahimo og war crimes sa panahon sa giyera sa Afghanistan.
Gidid-an ang mga nahisgotang ICC judges nga makasulod sa Amerika ug bisan unsang kabtangan o interes niini sa nasod, lakip na sa ekonomiya nga giilang labing dako sa kalibutan, pagahikawan.
Sa laing bahin, sa usa ka pamahayag, gihatagan og pagtagad ni US Secretary of State Marco Rubio nga buhaton sa Amerika ang tanang lakang nga gikinahanglan aron maprotektahan ang ilang soberaniya, lakip na ang soberanya sa Israel ug sa ilang mga kaalyado, batok sa mga giilang iligal nga aksyon sa ICC.
