Gipaklaro sa Malacañang nga buot gayud ni Pangulong Ferdinand Marcos Jr. nga mahatag ang labing makapahimulos sa mga Pilipinong magabubuhat.
Kini nga pamahayag maoy subay sa pag-apruba sa House of Representatives sa sugyot balaundon nga nagtumong sa P200 nga legislated wage increase.
Kahinumdumang, niadtong nakalabayng adlaw gipasa sa plenaryo sa Kamara ang maong panukala diin 172 ka mga kongresista ang mibotar pabor niini.
Sa wala pa kini maaprubahan, niadtong Lunes nakig-istorya na ang mga labor groups kang Pangulong Marcos sa Malacañang aron ipadayag ang ilahang suporta ug mga panginahanglan.
Wala usab mihatag og komento ang Palasyo kung aduna bay direktang suporta gikan sa Pangulo sa maong pag-apruba sa Kamara. Matod pa ni Palace Press Officer USec. Claire Castro, nga pagahisgutan pa sa gobyerno ang mga epekto niini sa ekonomiya. Giingon niya nga tan-awon pa sab sa Pangulo ang tanang aspeto ug mga kabalaka sa mga stakeholders.
Sa maong panagtagbo sa labor leaders, gipasabot ni Marcos nga ang iyahang prioridad mao ang pagpanalipod sa katungod ug kahimtang sa mga Pilipinong magbubuhat.
Gipadayag usab sa Pangulo nga ang gobyerno magpadayon sa suporta sa mga maayo nga pakig-istorya alang sa trabaho nga adunay dignidad, hustong sweldo, ug maayong kaugmaon alang sa tanang pamilya sa Pilipinas.
Apan, matod pa ni Castro, pagahisgutan pa gayud sa Pangulo kon iyahang pirmahan ug ipatuman nga balaod ang ang maong sugyot nga P200 wage hike. Bisan napasa na kini sa Kamara, kini moagi pa sa deliberasyon sa Senado.
