Gipasabot sa Department of Health (DOH) nga dili epektibong proteksyon batok sa monkeypox (mpox) ang pagsul-ob og facemask. Kabahin niini, girekomenda sa buhatan nga likayan ang paghalok ug paggakos aron malikayan ang sakit.
Sumala ni DOH spokesperson Dr. Albert Domingo, dili airborne ang mpox, busa dili face mask ang nag-unang panagang batok niini. Dugang pa sa pamahayag sa tagpamaba sa kalihim, mamahimo man nga magsul-ob og face mask ang usa ka tawo, apan kon maghalok o maggakos, posible gihapon nga matakdan sa maong sakit.
Nailhan nga ang mpox mapasa pinaagi sa physical contact, sama sa panit sa panit nga kontak, paghalok, o paggakos, bisan walay pakighilawas.
Bisan pa man nga misaka ang kaso sa mpox, gisiguro sa DOH nga mas ubos kini karon kung itandi sa tuig 2024, diin ang tanang kaso sa nasud nakategorisa isip Clade II, mas mild ug dili kaayo makatakod kung itandi sa Clade 1b nga mas dali makatakod. Sumala pa sa ahensya, wala pa’y narehistrong kaso sa Clade 1b sa Pilipinas.
Gisalikway usab sa DOH ang mga sayop nga impormasyon nga adunay planong lockdown tungod sa mpox.
