Nadaot ang usa ka automated counting machine (ACM) human kini gibubuan og tubig sa usa ka poll watcher sa usa ka polling precinct sa Marawi City kaganinang buntaga, atol sa nagpadayon nga eleksyon.
Dali sab nga miresponde ang kapulisan sa Marawi City, apan dali sab nga nakaikyas ang maong poll watcher sa wala pa sila makaabot sa maong dapit.
Gikumpirma sab sa technician gikan sa Commission on Elections (COMELEC) nga nadaot gayud ang makina tungod sa maong insidente.
Nasayran nga ang maong ACM gikatakda alang sa upat ka giusang presinto alang sa mga evacuee sa Marawi siege nga nahimutang sa Barangay West Marinaut ug Barangay Sagonsongan.
Temporaryo sab nga gihunong ang botohan sa maong lugar, apan dali usab kining napadayon human miabot ang kapuli nga counting machine.
