Gikumpirma sa Western Mindanao Command (Westmincom) ang nahitabong pagpamusil ngadto sa Barangay Langil, Hadji Mohammad Adjul, Basilan niadtong Domingo, Mayo 11, usa ka adlaw sa wala pa ang midterm elections, diin upat ang namatay sa insidente.
Giila ang mga napatay nga sila si Addahang “Marlboro” Abdulla, 45-anyos, ug Hajarani Maha, 63, nga parehong barangay tanod; ug ang duha ka suspek nga sila si Jul-Asbi “Imbo” Misuari, 44, ug Jun Awang, 39.
Matod ni Col. J-jay Javines, tigpamaba sa Westmincom, nga nag-inspeksyon na matud pa sila Abdulla ug Maha sa usa ka primary school nga magamit isip voting precinct sa eleksyon, sa dihang gipamusil sila gikan sa usa ka balay nga duol sa eskwelahan.
Miabot si Barangay Chairwoman Amna Pawaki uban ang iyang mga sakop, ug nasundan kini og engkwentro nga mitultol sa kamatayon sa duha ka suspek.
Gilayon nga nagpadala og dugang puwersa ang 101st Infantry Brigade aron masiguro ang seguridad sa Barangay Langil ug sa lungsod sa Hadji Mohammad Adjul.
Gisugdan na usab ang clearing ug hot pursuit operations batok sa mga nakapalagpot nga armadong suspetsado.
Samtang kaganinang buntag, Mayo 12, naablihan na ang mga presinto ug nagpadayon ang eleksyon bisan pa sa nahitabong insidente.
Gi-awhag usab sa kasundalohan ang publiko nga moboto sa malinawon nga pamaagi ug ireport ang bisan unsang impormasyon nga makatabang sa pagkadakop sa mga suspek pinaagi sa mga hotline sa Westmincom: 0917-504-4298 ug 0977-076-6870.
