Gibutyag sa Police Regional Office XI nga gihan-ay na ang 300 ka mga pulis aron mahimong magamit sa Commission on Elections (COMELEC) isip Special Electoral Board alang sa umaabot nga May 12, 2025 Elections. Ang maong lakang kabahin sa pagpangandam aron masiguro ang hapsay ug malinawon nga piniliay sa rehiyon.
Matod ni Police Major Catherine Dela Rey, ang tigpamaba sa PRO XI, adunay kinatibuk-ang 800 ka mga pulis gikan sa rehiyon ang gibansay sa COMELEC, diin 500 niini gipahimutang sa Bangsamoro Autonomous Region in Muslim Mindanao (BARMM), samtang ang 300 nagpabilin sa Davao Region isip mga standby electoral board members. Kini nga mga personahe mopuli kung adunay mga magtutudlo nga dili makaserbisyo sa eleksyon tungod sa bisan unsang rason.
Dugang pa ni Dela Rey nga sa kasaysayan sa piniliay sa rehiyon, wala pay kapulisan nga nagsilbing mga miyembro sa electoral board, apan giandam na kini karon isip kabahin sa kinatibuk-ang contingency plan sa eleksyon. Gipasalig usab sa PRO XI ang ilang suporta sa COMELEC aron masiguro ang kalinaw ug integridad sa eleksyon sa 2025.
