Gikasubo sa Barangay Bagumbayan, Lupon, Davao Oriental human malumos ug nakabsan sa kinabuhi ang duha ka managsuong menor de edad nga nangaligo sa kantiladong bahin sa dagat niadtong Abril 29, 2025. Giila ang mga biktima nga sila Gio Adornado, 6 anyos, ug Mico Adornado, 7 anyos, nga mga residente sa Catalunan Pequeño, Davao City.
Sumala ni LCDR Vincent Bryan Marcos, station commander sa Coast Guard Station Davao Oriental, pasado alas-10:00 sa buntag nakadawat og tawag ang ilang buhatan gikan sa MDRRMO-Lupon kabahin sa maong insidente. Gisulayan pa og luwas sa usa sa mga bata ang iyang igsuon, apan kapareho silang duha ang napakyas ug nalumos.
Daling misugod og Search and Retrieval operation ang Coast Guard ug mga rescuer, ug nakuha ang lawas sa duha ilawom sa dagat. Gisulayan pa sila og CPR ug giluwas padulong sa Lupon District Hospital, apan gideklarar na silang patay sa pag-abot. Giingon usab nga wala silay kaubang mga hamtong atol sa nahitabo. Sa kasamtangan, nagpadayon ang imbestigasyon sa maong panghitabo aron masuta ang kinatibuk-ang detalye sa insidente.
