Gibutyag sa National Security Council (NSC) nga aduna silay impormasyon nga nagpakita nga adunay plano ang China nga manghilabot sa umaabot nga eleksyon sa nasud karong bulan sa Mayo.
Sumala ni NSC Assistant Director General Jonathan Malaya, adunay mga indikasyon ug impormasyon nga nagpakita nga adunay ginahimong operasyon ang China sulod sa Pilipinas. Dugang pa niya, aduna matud pa’y kandidato nga gusto sa China nga modaog, busa naningkamot kini nga makapanghilabot sa eleksyon.
Wala kini direktang mipadayag kung kinsa gayud ang luyo sa maong lihok, tungod naggamit og mga third party individuals ug mga local proxies ang grupo aron matabunan ang ilahang tuyo.
Gumikan niini gi-awhag sa NSC ang publiko nga magbantay ug magmatngon batok sa posible nga pagpanghilabot sa eleksyon aron maprotektahan ang integridad sa demokratikong proseso sa nasud.
