Anaa sa kinatibuk-an nga 18 ka mga insidente sa pagkalumos ang natala sa tibuok nasod gikan Abril 13 hangtod 18, 2025, kini subay sa datos gikan sa Philippine National Police (PNP) kagahapon( Byernes Santo).
Sumala pa sa kapulisan, sa maong ihap, 15 ang nakabsan sa kinabuhi. Tungod niini, nagpahayag og kabalaka ang kapulisan sa pagsaka sa ihap sa mga insidente sa pagkalumos samtang padayon ang pagdagsa sa mga pamilya sa mga baybayon ug ubang destinasyon nga maligo ning panahon sa ting-init.
Subay sa SUMVAC 2025 Incident Monitoring Database, sa tanan nga insidente, duha ang naangol samtang usa ang wala’y nahitbaong kadaot.
Nzasayaran nga anaa sa siyam ka mga hamtong ug siyam usab ka mga menor de edad.
Subay sa giipakita nga database sa kapulisan, sa Rehiyon 1, duha ka kaso nga naglangkob sa mga menor de edad ang natala, ug silang duha nakbsan sa kinabuhi. Sa Rehiyon 2, usa ka menor de edad ug usa ka hamtong ang nalakip, ug silang duha naangol.
Sa Rehiyon 3, upat ka hamtong ang nal;umos diin tulo ang namatay ug usa ang nakaluwas. Sa Rehiyon 4A, upat ka insidente sa pagkalumos ang narekord, nga naglakip og duha ka menor de edad ug duha ka hamtong ug silang tanan namatay.
Sa laing bahin, ang Rehiyon 4B nakatala og usa ka insidente nga namatay nga usa ka menor de edad, samtang ang Rehiyon 5 adunay tulo ka mga nakabsan sa kinabuhi nga kini duha ka menor de edad ug usa ka hamtong.
Ang datos sa kapulisan nagpakita usab nga ang Rehiyon 6 ug Cordillera Administrative Region (CAR)adunay usa ka natala nga namatay tungod sa pagakalumos nga menor de edad ug usa ka hamtong.
Gumikan niini, nagpahimangno si PNP Chief Police General Rommel Francisco Marbil sa publiko, ilabi na sa mga ginikanan ug mga guardian, nga magpabiling mabinantayon kon mouban sa mga kalihukan nga adunay kalambigitan sa tubig karong ting-init.
Gisaad usab ni Marbil nga magpabiling committed ang kapulisan sa pagpanalipod sa seguridad sa publiko karong summer season.
