Gipahimangnoan sa Department of Health (DOH) ang mga deboto karong Semana Santa nga dili na kinahanglan nga samaran o pasakitan ang ilang kaugalingon isip penitensiya, sama sa pagpalansang sa krus ug paghampak sa likod o self-flagellation.
Sa usa ka interbyu, gikanayon ni Health spokesperson Assistant Secretary Albert Domingo nga dili kinahanglan nga samaran ang lawas, subay usab sa tambag sa mga kaparian.
Kung dili gayud malikayan ang buhaton, gi-awhag sa opisyal ang mga deboto nga gamiton lamang ang mga butang nga limpyo ug na-sanitize, o mogamit ug antiseptic sama sa iodine aron malikayan ang impeksiyon, ug hugasan pag-ayo ang mga samad gamit ang sabon ug limpyo nga tubig.
Dugang pa niya, ang mga samad nga nakuha tungod sa penitensiya gitawag nga “dirty wound” o hugaw nga samad, tungod posible kini’ng mahimong tinubdan sa bakterya gikan sa abog sa yuta o sa mga butang nga gigamit sa penitensiya.
Gipahimangnuan usab sa DOH nga likayan ang pag-ambak sa sapa o dagat human sa penitensiya, ug hugasan dayon ang samad sa limpyo nga paagi.
Gibuhat sa ahensiya ang maong pahimangno kauban sa tinuig nga tradisyon sa daghang Katolikong magtutuo nga magpenitensiya matag Mahal nga Adlaw aron ipakita ang ilahang pagbasol sa mga sala ug sa paghinumdom sa dakong sakripisyo ni Ginoong Hesu Kristo pinaagi sa pagpalangsang sa krus ug paghampak sa likod, nga kasagarang ginabuhat sa Huwebes Santo ug Biyernes Santo.
