Gikumperma sa Department of Foreign Affairs (DFA) ang pag-aresto sa tulo ka mga Pilipino gumikan kuno sa pagpangispiya. Gumikan niini, nakiglambigit na ang DFA sa gobyerno sa China aron mataral ug adunay due process ang nahisgutang alegasyon batok sa tulo ka mga Pilipino ug mapatigbabaw ang ilahang mga katungod.
Gipahayag ni Foreign Affairs spokesperson Teresita Daza, nasayod sila sa mga kaso sa tulo ka Pilipino nga kasamtangang gibilanggo sa China. Gipaneguro usab sa opisyal nga nagpabiling nag-unang prayoridad sa kagamhanan ang pagprotekta sa mga katungod ug interes sa nahisgutang mga Pilipino subay sa domestic law ug Philippines-China Consular Agreement.
Kasamtangang mihatag na usab ang Consulate General sa Pilipinas sa Guangzhou sa gikinahanglang tabang sa gipang-arestong Pilipino lakip na ang legal nga suporta. Ang mga nahisgutan giila nga si David Servanez, Albert Endencia ug Nathalie Plizardo.
