Nilapas na Tres mil ang narekober nga patay’ng lawas sa mga biktima sa linog nga niigo sa Myanmar dul-an usa ka semana ang nakalabay. Subay sa datos nga gipaguwa sa hingtungdan nga ahensya sa nasud anaa sa 3,085 ang narekober nga patay’ng lawas. Sumala pa sa gobyerno nga gipangulohan sa militar, nga nagkadaghan ang nakit-an niining mga lawas sa padayon nga search and rescue operation.
Samtang anaa usab sa 4,715 ka mga tawo ang samdan ug 341 ang na-missing. Kahinumduman nga miigo ang episentro sa linog nga adunay gikusgon nga 7.7 nga magnitude niadtong Biyernes nga anaa duol sa Mandalay, ang ikaduhang dakong siyudad sa Myanmar. Tungod usab sa nasampit nga pagtay-og, liboan ka mga building, mga pinuy-anan, lakip ang mga karsada ug tulay ang naguba sa daghang bahin sa rehiyon.
Gikabalak-an usab karong panahuna sa mga otoridad nga posibli nga madugangan pa ang ihap sa mga nangamatay tungod adunay pipila pa ka mga lugar ang wala pa’y komunikasyon karong panahuna nga naa sa mga hilit nga lugar.
