Ikatulo ang Pilipinas sa mga nasud sa Asya nga nakasinati sa dili kasagaran nga kainit sa nakalabay nga tulo ka bulan kon (Disyembre hangtod Pebrero) tungod sa climate change. Sumala sa report sa Climate Central, ang Pilipinas nakasinati og temperatura nga niabot sa Climate Shift Index (CSI) level 2 o mas taas pa sulod sa 74 ka adlaw.
Ang Climate Shift Index (CSI) usa ka sistema nga nagasukod sa epekto sa climate change sa temperatura sa usa ka nasud matag adlaw. Mas taas ang CSI level, mas dako ang epekto sa climate change.
Ang nag-unang hinungdan sa nagkataas nga kainit mao ang pagsunog sa uling (coal), lana (oil), ug methane gas, nga kasagaran nagagikan sa nagkadaiyang rehiyon sa tibuok kalibutan. Nasayran nga kapin sa 45 milyon ka mga tawo sa Asya ang naapektuhan 30 ka adlaw nga peligro sa kainit.
Samtang dinhi sa nasud usab, dul-an 200,000 ka mga Pilipino ang na-expose sa extreme heat gikan sa 116 milyon nga populasyon.
Ang mga apektadong nasud sa Asya nga adunay most unusual heat ang Brunei Darussalam nga adunay 83 ka adlaw nga extreme heat, Maldives nga adunay 81 ka adlaw nga extreme heat ug ang Pilipinas nga adunay 74 ka adlaw nga extreme heat.
Ang padayon nga pagtaas sa temperatura makapadako sa risgo sa panglawas, agrikultura, ug ekonomiya, hinungdan nga kinahanglan og mas lig-on nga aksyon sa pagpakunhod sa epekto sa climate change.
