Nisaad ang lead counsel ni kanhi Pangulong Rodrigo Duterte nga maghatag kini og lig-on nga depensa sa kaso sa kanhing Pangulo ug naglaum nga mabalik siya sa Pilipinas.
Gibuhat ni British lawyer Nicholas Kaufman ang maong pamahayag samtang maampingong giplano ang sunod nga mga lakang sa kaso sa kanhing Pangulo sa International Criminal Court (ICC) kalabotan sa crimes against humanity nga gituohang nahitabo atol sa maduguong giyera kontra droga.
Sa pakighinabi sa media sa The Hague, Netherlands, gipahayag ni Kaufman nga anaa pa sila sa proseso sa pagkumpleto sa defense team sa kanhing Pangulo.
Sa miaging pamahayag sa kampo ni Duterte, gipadayag nga apil sa defense team sa kanhing Pangulo sila kanhi executive secretary Salvador Medialdea ug kanhi presidential spokesperson ug myembro sa ICC List of Counsel nga si Atty. Harry Roque isip mga supporting lawyer.
Samtang, naglikay pa si Kaufman sa paghatag og dugang detalye mahitungod sa maong isyu samtang wala pa mouyon si Duterte sa mopadayon sa iyang defense panel. Matod ni Kaufman, kinahanglan nga adunay senior counsel nga eksperto o adunay kasinatian sa mga kaso sa ICC aron magmugna sa maong team.
Dugang pa, nagplano usab sila sa pagpasa og dugang mga petisyon apan ipahibalo lamang ang impormasyon mahitungod niini kung mapinal na ang defense team.
