Nagapadayon sa paghatag og serbisyo alang sa mga indibidwal nga adunay problema sa mental health ang Mental Wellness Center for the Homeless (MWCH) sa Davao City, diin gikan sa Enero hangtod Disyembre 2024, nakatabang na ang center og 297 ka outpatients ug 24 ka pasyente na usab ang nadawat alang sa ilang komprehensibo nga pag-atiman sa mental health.
Sumala pa ni Dr. Luis Antonio Flores, manager sa MWCH, nga ang tanang health centers sa Davao City andam na sa paghatag og serbisyo sa mental health gumikan sa ilang pagbansay pinaagi sa Mental Health Gap Action Program.
Gipasabot usab niini nga mamahimo na nga muadto ang mga pasyente sa ilang duol nga health center imbis nga magpaabot pa sa Southern Philippines Medical Center (SPMC) alang sa ilang konsultasyon sa mental health.
Giawhag usab ni Flores ang mga pamilya nga bantayan ang mga simtomas sa panghunahuna sa ilang kabanay susama sa kalit nga kausaban sa kinaiya, pagkawala sa gana sa pagkaon, ug kakulang o kalabian sa tulog, kung adunay ing ani nga mga problema dali nga mangita og medikal nga tabang o mudoul sa ilang center.
Ang mga Dabawenyo nga nanginahanglan og suporta sa mental health mamahimo usab nga mutawag kanila o moadto mismo sa opisina sa MWCH nga nahimutang sa SPMC-IPBM Compound, C.M. Recto Street, Poblacion District.
