Gibtuyag sa Presidential Commission on Good Government (PCGG) nga anaa sa 16 ka sakyanan ang narekober sa gobyerno gikan sa bag-ohay lamang nga gibasura nga ill-gotten wealth case batok kang kanhing Pangulong Ferdinand Marcos Sr. ug sa iyang asawa nga si kanhing First Lady Imelda Marcos.
Gipagawas sa PCGG ang maong pahayag human nga gibasura sa Sandiganbayan ang ill-gotten wealth case sa ilalom sa Civil Case 0032 nga giduso batok sa kanhing first couple ug sa ilang associates gumikan sa pagkawala’y aksyon sa state prosecutors sa maong kaso nga mitanggong og kapin 4 ka dekada.
Kahinumdoman, nga giduso sa PCGG ang maong kaso kaniadtong Hulyo, 1987 batok sa mag-asawa nga Marcos ug kanhing Malacañang photographer Fernando Timbol.
Lakip sa maong kaso ang 21 ka motor vehicles ug household appliances nga nagkantidad og P5 million nga iligal sumala pa nga nakuha ni Timbol nga kinahanglan maibalik sa gobyerno.
Samtang, sa gipagawas nga pahayag sa ahensiya, gisaysay niini ang nahimo nga desisyon sa Korte Suprema kaniadtong Pebrero 8, 1989 kung diin gideklara kini isip ill-gotten wealth ang maong properties nga nakuha sa defendant nga si Timbol ug forfeited kini pabor sa gobyerno.
Giisyu usab sumala pa ang usa ka writ of execution nga magpabalhin sa kustodiya sa gikaingon nga mga sakyanan sa PCGG, maong nagmalampuson nga narekober ang 16 nga forfeited motor vehicles.
Gipasabot usab sa PCGG nga nagpabilin nga nakatanggong ang proceeding sa Sandiganbayan hangtud nga mitakda sumala pa ang anti-graft court og case conference kaniadtong Enero 21 sa kasamtangan nga tuig, aron nga himoun kini nga case closed.
Sa maong conference, wala na sumala pa mibabag pa ang PCGG kung ikonsidera kini sa korte isip case closed ug terminated gumikan nagmalampuson na sumala pa sa komisyon ang writ of execution pinaagi sa pagturn-over sa mga property ug misugot na sumala pa ang Office of the Solicitor General sa pagsirado ug paghuman sa maong kaso.
