Gikatala sa National Disaster Risk Reduction and Management Council (NDRRMC) nga mikabat na sa kapin 44,000 ka pamilya ang apektado sa mga pag-ulan gumikan sa shear line nga miresulta sa pagbaha sa Palawan ug Occidental Mindoro.
Sa ulahi nga datos sa NDRRMC, adunay 13,067 ka pamilya nga gilangkoban og 44,058 ka indibidwal gikan sa 10 lungsod ug munisipalidad sa Palawan ug Occidental Mindoro ang naapektuhan sa pagbaha.
Ang mga apektado nga lugar mao ang Aborlan, Brooke’s Point, Narra, Sofronio Española, ug Puerto Princesa City sa Palawan; lakip usab sa apektado ang Baco, Calapan, Naujan, Socorro, ug Victoria sa Occidental Mindoro.
Anaa sa 7,800 ka indibidwal usab ang gipahikling gikan sa ilang mga panimalay ug gidala sa 49 ka evacuation centers.
Samtang, naluwas usab sa Philippine Coast Guard (PCG) ang 108 indibidwal gikan sa pito ka mga barangay nga nalubog sa baha sa Puerto Princesa City.
Sumala sa ahensiya, nga ang mga naluwas nga indibidwal naggikan sa Barangay San Manuel, San Pedro, Bancao-Bancao, San Jose, Sicsican, Irawan, ug Wescom Road.
Kahinumdon, nga nakasinati og pag-ulan ang Palawan gumikan sa epekto sa shear line, o ang convergence kon ang pagtagbo sa bugnaw ug init nga hangin nga nagdala og mga pag-ulan nga nagsugod pa kaniadtong Pebrero 9.
