Magsugod na og pagdawat ang Educational Benefit System Unit (EBSU) sa City Government of Davao og aplikasyon alang sa scholarship sa buwan sa Abril alang sa school year 2025-2026.
Adunay kinatibok-an nga 500 ka slots ang mamahimo nga magamit, lakip na ang 300 ka dugang nga slots nga gi-aprobahan sa Lokal nga panggamhanan.
Kini naglakip sa 100 ka slots sa Financial Assistance Program alang sa mga Indigenous Peoples (IPs), 100 alang sa Technical and Vocational Skills Training Program, ug 100 usab alang sa mga Persons with Disabilities (PWDs).
Ang mga programa sa scholarship naglakip sa Scholarship on Tertiary Education Program — Financial Assistance (STEP-FA), Special Educational Assistance Program (SEAP), Technical and Vocational Skills Training Program, ug uban pa.
Gipasabot usab sa buhatan ang mga kategorya sa STEP program nga gibahin sa tulo nga adunay nagkadaiyang financial assistance susama sa Category A nga adunay P25,000 matag semester kon P50,000 matag tuig alang sa mga magtutungha nga adunay average nga 93 o labaw pa, samtang, ang Category B adunay P20,000 matag semester kon P40,000 matag tuig alang sa mga magtutungha nga adunay average nga 90 hangtod 92 ug ang Category C adunay P7,500 matag semester kon P15,000 matag tuig alang sa mga magtutungha nga adunay average nga 80 hangtod 89.
Dugang pa niini, nga ang ubang benepisyo naglakip sa P15,000 alang sa mga magtutungha sa Technical and Vocational Skills Training Program ug P10,000 alang sa mga magtutungha nga adunay ‘special needs’.
Gipahibalo usab sa EBSU, nga ang mga aplikante kinahanglan magdala og mga dokumento susama sa certificate of residency, certificate of indigency, income tax returns, ug mga grado sa tulunghaan.
Samtang, alang usab sa mga nag-aplikar sa Law and Medical Education program, kinahanglan nga adunay average nga grado nga 85.
Alang usab sa mga Lumad nga magtutungha, kinahanglan nga magdala og National Commission on Indigenous Peoples (NCIP) certificate.
Dugang pa niini, nga mga interesado nga aplikante mamahimo usab mubisita sa website sa City Government of Davao o sa EBSU-STEP Facebook Page alang sa dugang nga mga detalye.
