Gibutyag ni Jovana Cresta Duhaylungsod, tigpamaba sa Davao City Water District nga maglusad ang buhatan og entrapment operations aron masikop ang mga indibidwal nga nalambigit sa pagpangawat og mga water meter.
Ang maong lakang alang usab sa pagpakusog niini sa ilang water supply ngadto sa mga residential homes diin mao kanunay ang makasinati sa giingong iligal nga aktibidad.
Sumala pa sa tigpamaba, dako ang tabang sa kumunidad aron nga dili pamarisan sa katawhan ang pagpangawat usab og mga water meters.
Gikanayon usab niini nga sa pipilang higayon nga mitaod kini og bag-ong mga metrohan ngadto sa gipangkawatang mga households wala na kini buot dayon pang ipahamtang nga kaso.
Rason nga miawhag kini nga mamahimong bigilante pa ang katawhan ug gilayon nga ireport ang susamang kalihukan sa ilang buhatan kun dunay mamatikdan.
Dugang niini, mamahimo usab nga mureklamo mismo ang maong gibaligyaan sa mga kinawat nga metro sa tubig, ingon man nga mugara ang mga kawatan kun walay ipahamtang nga aksyon.
Samtang sa laing bahin, laraw usab nga pahalpdan pa sa DCWD ang serbisyo niini sa dakbayan human nga makab-ot niini ang mas hataas pa nga target service connection mark.
Nagalaom usab kini nga mas madugangan pa ang mukuha og serbisyo sa ilahang buhatan human usab nga mirenew ang DCWD board of directors and management sa 500 installment service connection niini sa publiko nga epektibo gikan kaniadtong unang semana sa Enero.
