DCPO, magpakatag og kapin 1000 ka mga pulis, alang sa pagsugod sa umalabot nga Misa de Gallo

Gikatakdang magpakatag og kapin 1000 ka mga personahe ang Davao City Police Office atol sa pagsugod sa Misa De Gallo dinhi sa dakbayan.

Sumala pa ni P/Capt Hazel Tuazon, nga nakaandam na ang ilahang buhatan sa pagsigurong mamahimong luwas og hapsay ang pagsugod sa Misa De Gallo karung umalabot nga petsa 16 bulan sa Disyembre hangtod petsa 24 ning bulana.

Dugang pa ni Tuazon nga usa sa ilahang prayoridad ang pagsugod ug kahumanan sa Misa De Gallo inubanan sa padayong selebrasyon sa Pasko Fiesta 2024.

Gani, gina-awhag usab sa maong opisyal ang publiko nga mamahimong musunod sa mga pahimangno sa kapulisan ilabi na ang pagsunod sa mga ginabawal nga pangdal-on o himuon.