Gibaha ang mga nagkadaiyang agianan kagahapon sa gabii ang Tibungco Public Market, gumikan sa kalit nga pagbundak sa makusog nga ulan.
Makita sa maong kahimtang sa mga vendors nga hilabihan gayud ang kakusog sa bul-og sa tubig baha ngadto sa mga agianan sa maong merkado, diin maoy nakahatag usab og tumang kahasol ngadto sa mga vendors, lakip na usab sa mga mamalitay.
Sumala pa sa pipila ka mga tawo nga anaa sa maong dapit partikular na ang mga naninda nga naglisod matud pa sila gumikan dili sila makalihok tungod sa kusog nga pag-aginod sa maong tubig baha.
Dugang pa nga dili matud pa malikayang mabalaka gumikan na usab nga kalit-kalit kining nahitabo.
Usa sab sa ginalantaw nilang hinungdan sa maong pagbaha mao ang mga basura nga nagbara sa mga drainage ug sa mga kanal sa ilahang palengke, hinungdan nga dili dayon kini makaagi ang mga tubig nga nagasubay sa maong kanal.
Samtang nagpaguwa usab og pahibalo ang taga DCDRRMO labot sa maong kalit nga bundak sa ulan nga usa matud pa kini ka localized thunderstorms lamang.
Subli sab kining nagpahimangno ngadto sa publiko nga kanunayng magbinantayon sa tanang higayon aron nga malikay ang kaugalingon sa mga posibleng kapeligrohan.
