Gibutyag ni Senate President Francis “Chiz” Escudero nga wala pa kini nakadawat og bisan unsang pormal nga dayalogo ngadto sa International Criminal Court (ICC) labot sa ulahing giluwat nga pamahayag ni kanhi Pangulong Rodrigo Duterte, atol sa gipahigayong Senate Inquiry niadtong adlawong Lunes kabahin sa war on drugs.
Dugang pa niini nga wala matud pay kahadlok ang maong kanhi Pangulo, diin walay lipod-lipod kining gibutyag ang tanan labot sa drug war. Makita sab sumala pa ngadto kang Duterte nga nanghinambog pa kini sa iyahang mga nabuhat kaniadtong anaa pa kini sa posisyon sa pagka-pangulo sa nasud.
Lakip sab sa gisaway ni Escudero ang sige og pagpamalikas ni Duterte sa maong inquiry, nga wala matud pa kanay luna sulod sa Senado.
Kahinumdumang niadtong Lunes, gisulti ni FPRRD ngadto sa atubangan sa mga magababalaod ang pag-angkon matud pa niini sa tanang legal nga responsibilidad labot sa war on drugs, diin gidepensahan sab niini ang mga opisyal sa kapulisan labot sa pagpatuman matud pa sa gikaingong maduguong gyera batok sa iligal nga droga.
Samtang, subling gitataw usab sa Malacañang nga magpabilin gihapon matud pa ang Pilipinas sa posisyon niini nga dili na gayud kini mubalik sa sabakan sa ICC.
Subay na usab sa una nang pamahayag ni Pangulong Bongbong Marcos Jr. nga dili kini ilahon ang hurisdiksyon sa ICC dinhi sa nasud Pilipinas.
