Gikatakdang pagasugdan na ang imbestigasyon sa Senado sa maduguong drug war sa kanhi administrasyong Duterte karong Oktobre 28 ning kasamtangan nga tuig samtang naka-recess ang kongreso, matod pa ni Senator Aquilino “Koko” Pimentel III.
Gipahayag ni Pimentel, vice cgairman sa Senate Blue Ribbon Committee, pipila sa naimbitahan sa pagdungog mao si kanhi Pangulong Rodrigo Duterte, retired Police Colonel Royina Garma, kanhi National Police Commission commissioner Edilberto Leonardo, former Senator Leila de Lima, Kerwin Espinosa, ug halos tanang pamilya sa drug war victims.
Dugang pa ni Pimentel, gikinahanglang dali-on ang imbestigasyon gumikan kay gikatakdang ipailalom sa Senado sa debate ang national budget sa 2025 nga magsugod sa Nobyembre 4.
Dugang pa sa senador nga bisan adunay panawagan kang Senador Bong Go ug Ronald Dela Rosa nga pulos kaalyado ni Duterte nga mupailalom sa indefinite leave sa pagahimuong Senate investigation, ang presensya sa mga nahisgutan ang dili makaapekto sa kridibilad sa imbestigasyon.
Ang nahisgutang imbestigasyon ang dungan sa mga pagdungog sa House of Representatives sa EJK kung diin gihisgutan ang tanang testimonya sa pamilya sa mga biktima, law enforcement officials ug human rights advocates.
