Gitawag sa Office of the Vice President nga inaccurate ug misleading ang gibutyag ni DSWD Secretary Rex Gatchalian nga wala matud pa silay ginabalibaran nga mga ginadangop sa OVP ngadto sa buhatan sa DSWD labot sa ayuda.
Dugang pa niini, nga anaa sa makadaghang higayon na sumala pa nga ginabalibaran sa maong ahensya ang referals sa buhatan ni Vice President Sara Duterte, pananglitan na lamang mao ang pag-request nila og tabang alang sa mga naapektuhan sa African Swine Fever (ASF).
Wala sab matud pa nagalaum ang OVP ngadto sa DSWD gumikan dili sumala pa kaya sa ahensya ang mass pay-out labot sa ayuda.
Apan kahibulungan sumala pa gumikan dali lamang matud pa nga mabuhat sa DSWD ang paghatag og hinabang nga ayuda ngadto sa laing dapit, inubanan pa sa mga pulitiko.
Wala sab sumala pay tataw nga pagpaklaro ang DSWD og nganong dili matud pa matagaan gilayon og ayuda ang mga ginadangop nga request gikan sa OVP.
Niadtong Lunes, gigisa nila ni Senador Bong Go ug ni Senadora Imee Marcos si Gatchalian atol sa gipahigayong pagdungog sa Senate Committee sa sumala pa adunay pagpamulitika sa mga ayuda.
Apan hingpit sab nga gihimakak ni Sec. Gatchalian ang pasangil sa OVP nga wa matud pa ginatagad sa DSWD ang ilang hangyo.
Gani, diversionary tactic lamang matud pa kini aron nga dungagan ang pondo sa Office of the Vice President.
