Naglusad na ang Philippine National Police (PNP) ug manhunt kang kanhi presidential spokesperson Harry Roque homan kini gi-cite for contempt sa kamara, sa matod pa kalambigitan niini sa iligal nga Philippine offshore gaming operators (POGOs).
Pipila kahigayong gi-isnab ni Roque ang pagpatawag kaniya sa joint house panel aron imbestigahan ang nahisgutang isyu. Si Roque ang nagserbisyo isip tigpamaba ni kanhi Pangulong Rodrigo Duterte.
Gumikan kay mibalibad nga makigtinabangay, gikinahanglan nang magpagawas ug arrest warrant ang mga awtoridad.
Wala na usab naabtan sa mga awtoridad si Roque sa opisina niini sa Makati nga nagpakuyanap sa hisgutanan nga posibleng gisulayan na niining daganan ang iyang tulubagon nga makigtinabangay sa gobyerno.
Subay niini, gipahayag ni Santa Rosa City Rep. Dan Fernandez, co-chair sa Quad Committee nga fully engaged na karon ang PNP sa pagpangita kang Atty. Harry Roque ug No one is above the law.
Kung kahinumduman, giakusahan si Roque nga adunay gihuptang mga dokumento lakip na ang iyahang Statements of Assets, Liabilities, and Net Worth ug rekord nga adunay kalabutan sa iyahang family business nga Biancham Holdings. Ang nahisgutang mga rekord kuno ang muhatag ug kahayag sa matod pa kalambigitan niini sa Lucky South 99, usa ka POGO hub sa Porac, Pampanga nga giimbestigahan gumikan sa iligal nga operasyon.
Nakiglambigit na usab ang PNP sa uban pang ahensya sa kagamhanan aron gukdon si Roque nga gikatuhuang nagtago na.
Samtang gipahayag usab ni Rep. Robert Ace Barbers of Surigao del Norte, pangulo sa House Committee on Dangerous Drugs nga ang hugot nga pagbalibad ni Roque nga makigtinabangay ug ang pagtago, nagpataas lamang sa pagduda sa kalambigitan niini sa POGO industry.
Sa nakalabayng pahayag, gibatikos ni Roque ang imbestigasyon sa joint panel nga gitawag niining Kangaroo Court ug mibarog nga dili kini musalmot sa mga pagdungog.
