DAVAO CITY- Gipahigayon kaganihang kaadlawona ang simulation exercise sa Roxas Avenue ug sa Coastal Road ning dakbayan sa Davao.
Kini nga kalihukan ang kabahin sa seguridad ug preparasyon sa ika-39 nga Kadayawan Festival.
Nasayran nga adunay duha ka mga scenario ang gilusad sa mga otoridad nga girespondehan kini sa mga nagkadaiyang unit sa kapulisan, kasundaluhan ingon man sa mga rescue team sa dakbayan sa pagpanguna sa Public Safety and Security Office (PSSO) ug Central 911.
Sa unang scenario kunuhay adunay nahitabo nga terror attack sa Coastal Road diin adunay usa ka bagahe nga giabandona ug adunay eksplosibo nga dali usab kining gitaho sa mga otoridad, ug pipila lamang ka minutos gilayon kining girespondehan.
Gilayon nga gikordon ang lugar aron nga dili kini maagi-an sa mga sibilya ug mga sakyanan samtang nagpahigayon pa ug pagsusi ang K-9 ug bomb squad.
Samtang alang sa ikaduhang scenario, gipahigayon kini sa Roxas Avenue atubangan sa convenience store nga adunay nahitabo nga pagbusikad ug adunay daghan sumala pa ang naalaot ang kinabuhi ug ingon man nanga-angol sa maong panghitabo.
Gilayon nga girespondehan kini sa mga otoridad pipila lamang ka minutos ang nakalabay.
Gilayon nga adunay gipahigayon nga rescue operations sa mga biktima ug ingon man ang pagpahigayon ug hot pursuit operation sa mga otoridad nga miresulta sa pagkasikop sa duha ka mga responsabli sa maong panghiatabo.
Sa kinatibuk-an nahimong malampuson ang maong kalihukan alayon kini sa preparasyon sa pagsaulog sa Kadaywan festival.
Apan gumikan sa maong aktibidad, dili kalikayan nga adunay pipila gihapon ang nabalaka sa ilahang nakita.
Kahimuduman nga una ng nagpahibalo ang dakbayan sa Davao ngadto sa katawhan adunay ipahigayon nga simulation exercise (simex) sa dakbayan bisan unsa orasa karon nga bulan.
Tungod niini laoman sa publiko nga mahimong guot nga dagan sa trapiko ug madelatar ang byahe ning panahuna, busa ginahangyo ang tanan sa pagsabot ug likayan ang pag-panic.
Ang maong Simex gipahigayon isip pagpakusog sa kampanya sa syudad nga Culture of Security “May Nakita, Dapat Magsalita”.
