Giklaro ni Senador Ronald “Bato” dela Rosa nga dili kini mosugot nga maaresto sa International Criminal Police Organization–INTERPOL gumikan sa drug war deaths, gawas lamang mutabang ang lokal nga awtoridad sa Interpol.
Dugang gipahayag sa kanhi PNP Chief nga mao usab ang nagpatuman drug war sa kanhi administrasyong Duterte, dili kini mo-surrender sa Interpol sa higayong mag-serve ug warrant gumikan kay wala kini jurisdiction sa Pilipinas.
Apan kung ugaling tabangan ang Interpol sa lokal nga kapulisan, dili kini makig-giyera sa kapulisan sa nasud.
Matod pa sa Senador, gikinahanglang mulihok ang PNP subay sa desisyon sa lokal nga korte ug dili sa mga awtoridad sa kalibutan ug anaa na usa sa PNP ang paghukom kung unsa ang buhaton.
Apan gipahayag usab ni Senador dela Rosa nga mosugot kining ma-interview sa International Criminal Court (ICC) apan wala usab nagpasabot nga mi-surrender na kini sa jurisdiction sa ICC.
Gi-imbestigahan sa ICC ang kanhi Pangulong Duterte ug uban pang hataas nga opisyal sa administrasyon niini ug crimes against humanity gumikan sa sistematikong pagpatay sa drug war sa mga operasyon sa kapulisan.
Gikabutyag nga mosobra sa 30,000 ang matod pa napatay sa drug war subay sa datos sa human rights groups lakip na ang mga inosenting menor de edad ug sibilyan susama kang Kian delos Santos, usa ka estudyanteng gipatay sa C-3 sa Caloocan bisan paman nga nagpakiluoy na kini.
Samtang gipahayag usab ni kanhi Majority Leader, Senator Joel Villanueva nga hugot gidili sa senado ang pag-aresto sa bisan kinsang senador sa higayong adinay sesyon.
Apan kaniadto, gi-aresto si kanhi Senador Leila De Lima sa panahon sa administrasyong Duterte samtang adunay sesyon ang Senado, hangtod nakulong ug halos pito katuig gumikan sa peke nga drug case.
