DAVAO CITY- Gikabalaka sa mga myembro sa Kingdom ug Jesus Christ (KOJC) ang pagpwesto sa daghanang personahe sa Special Weapons and Tactics (SWAT) gawas mismo sa ilang simbahan, kagabii.
Sumala pa sa pipila ka myembro sa KOJC nga gikahibulong nila ang presensya sa mga nahisgutan hilabi pa nga wala kini nihatag og pagpasabot ug katin-awan sa maong lakang.
Gumikan niini, nahimong bug-at ang dagan sa trapiko sa maong dapit kung diin daghanang mga estudyante ug trabahante ang nangatanggong sa kadalanan inay nga dali makauli sa ilang mga panimalay.
Sumala pa sa KOJC nga gisuwayan nila og hinabi ang mga otoridad nga nagapahigayon og checkpoint gawas sa ilang simbahan apan nagdumili kini sa paghatag og katin-awan ug igo lamang gikanayon nga kabahin kini sa police visibility.
Nakadugang sa mga pangutana sa KOJC ang pagsuot og full-gear sa mga otoridad kung diin makonsidera kining high risk sitution. Gawas niini, nakatabon usab ang mga nawng sa SWAT Team lakip na ang numero sa ilang mga sakyanan.
Kahinumduman nga una na gikabutyag sa mga supporters ni Quiboloy nga dili na maayo ang pagmuntar og daghanang mga pulis ug uban pang mga otoridad gawas sa simbahan gumikan makahatag kini og kahadlok sa mga bata lakip na sa mga estudyante sulod sa ilang skwelahan.
Alayon niini, mas gipahugtan karon sa KOJC ang pahibalo kabahin sa gitanyag nga P20M alang sa mga makatudlo sa kinsa mang boot mopatay kay Pastor Apollo Quiboloy.
Ning kasamtangan, gibutyag ni PRO XI Spokesperson PMaj. Catherine dela Rey nga duna silay laraw nga dili pa mabutyag sa katawhan. Labing importante matud pa ang pagbuhat gihapon nila sa ilang mga trabaho subay na usab sa crime prevention ug police visibility.
