DAVAO CITY- Gikahibulong karon ni Councilor Tek Ocampo ang gikanayong rason ni PBGen. Nicholas Torre III sa pagmuntar og checkpoint atubangan mismo sa KOJC Compound, Buhangin, ning dakbayan.
Sa gikabutyag nga rason ni Torre kaniya, kabahin ang maong lakang sa ilang natun-an diin dakong tabang aron sa paspas nga pagsikop sa mga suspek o bisan unsa mang panghitabo sanglit nagsilbi kining exit point sa syudad.
Apan sumala pa ni Counselor Ocampo, daghanang exit points ang syudad ug dili kini ang atbang sa Compound ni Pastor Apollo Quiboloy.
Tungod niini, nahimong kwestyunable ang gikabutyag nga rason ni Torre hilabi pa nga posibleng nakalimtan sa opisyal ang mga lugar sa Tibungco, Panacan, ug Panabo nga mao gayuy naila nga mga exit points sa dakbayan.
Posible matud pa nga stratehiya kini sa mga kapulisan aron sa pagbantay sa maong dapit hilabi pa sa pagtuman sa laraw nga madakpan ang kasamtangang ginapangita nga pastor.
Una nang gikabutyag ni Torre nga dili niya pokus ang pagdakop kay Quiboloy apan nagpadayon gihapon ang pagpangita niini hilabi pa nga adunay National Headquarters nga nagatutok sa maong kaso.
